Cun l’avertüra dal museum Chasa Jaura ha il scriptur, bibliotecar e perscrutader local Tista Murk (1915–1992) da Müstair ragiunt seis böt da crear ün forum da cultura da la Val Müstair. Là ha’l magazinà sia biblioteca documentara privata in diversas s-chaffas. Ravarenda Hans-Peter Schreich s’occupaiva dal fundus prezius, til chüraiva e til augmaintaiva sco plaiv d’onur dürant 38 ons. Fin pro sia demischiun 2022 sviluppa’l la biblioteca jaura ad ün center da documentaziun da la rumantschia e da la Val Müstair. La collecziun as rechatta aint l’anteriura chasa cumünala da Valchava. Ella cumpiglia passa 5000 cudeschs, manuscrits istorics, actas e diversas medias da l’istorgia da la Val e da las Vals laterals. La società Chasa Jaura es proprietaria da la biblioteca jaura. Las localitats vegnan miss a disposiziun gratuitamaing dal Cumün da Val Müstair.
Illa clostra Son Jon han lö perscrutaziuns archeologicas daspö l’on 1969. L’archiv conserva tuot las copchas da la documentaziun ed implü tuot ils chats archeologics. Davo l’instituziun da la Bauhütte 2004 sun gnüts ramassadas aint il archiv da fabrica tuot las actas relevantas dad architects, restoraturs e da differents perscrutaders. Ella cumpiglia eir las actas da la fundaziun Pro Clostra Son Jon, chi’d es gnüda fundada 1969. In vista al center da retscherchas hana miss ad ir üna biblioteca speciala. D’incuort es quista gnüda augmantada considerabelmaing cun donaziuns. Proprietaria resta la fundaziun pro clostra Son Jon.
Ils chapütschins da la provinza Bulsan han manà da 1701 fin 2002 ün ospiz a Müstair. Davo la finischiun han ils paders laschà inavo üna part da lur scrittüras. La fundaziun Pro Clostra Son Jon ha surtut quist relasch, causa cha’ls iertaivels – la raspada catolica-romana da Müstair – nu dispuona ne da localitats ne da mez per til conservar. Il relasch cumpiglia circa 1600 cudeschs e notaziuns scrittas a man dal 16avel fin 20avel tschientiner. Is tratta dad ouvras d’agricultura, d’astronomia, d’economia, cudeschs giuridics e per l’instrucziun. La collecziun nun es amo accessibla. Ella d’eira fin qua magazinada e nu d’eira chürada. Daspö pac temp es la fundaziun Pro Clostra Son Jon proprietaria.
La società Archiv culturals da la Val Müstair ha surtut l’incumbenza da chürar ils trais archivs e da tils far accessibels.